MAWBIMA ”පැය 8න් පසු විදුලිය බිඳ වැටුණොත් සේවය සපයන්නේ නැහැ” – ලංවිම ඉන්ජිනේරුවරු

ලංකා විදුලිබල මණ්ඩලයේ ඉන්ජිනේරු සංගමය දියත් කළ අකුරට වැඩ කිරීමේ ක්‍රියාමාර්ගය තවදුරට ත් දැඩි කරමින් පැය 8ක සේවා කාලයෙන් බාහිරව විදුලි බිඳ වැටීම් සඳහා සිය සේවය ලබා නොදීමට එම සංගමය තීරණය කර තිබේ.

අද (දෙසැ. 1) පැවති මාධ්‍ය හමුවකට එක්වෙමින් එහි සභාපති සෞම්‍ය කුමාරවඩු මහතා සඳහන් කළේ, මීට පෙර අකුරට වැඩ කිරීමේ ක්‍රියාමාර්ගයකට යොමුව සිටිය ද හදිසි බිඳ වැටීම්වලදී රාජකාරි කටයුතු කළ බව ය.

කෙසේ වෙතත්, ඉදිරියේදී ප.ව.4.15න් පසුව සිදුවන විදුලි බිඳ වැටීම් යථා තත්ත්වයට පත් කිරීම සඳහා සහභාගී නොවීමට තීරණය කර ඇති බව ඔහු ප්‍රකාශ කළේ ය.

මෙම ක්‍රියාමාර්ගයට එළඹීම සඳහා හේතු වී ඇති කරුණු සම්බන්ධයෙන් පැහැදිලි කරමින් ඔහු සඳහන් කළේ, ලංවිම සභාපතිවරයා විසින් අත්තනෝමතික ලෙස අතිරේක සාමාන්‍යාධිකාරීවරුන් දෙනෙකු අනිවාර්ය නිවාඩු යැවීම බව ය.

ඊට අදාළ ලිපිය ඉවත් කර ගැනීමට සභාපතිවරයා හමුවීමට උත්සාහ කළ ද අද දින එයට නිසි ප්‍රතිචාරයක් හිමි නොවුණු බව ඔහු පැවසීය.

නිව් ෆෝට්‍රස් ගිවිසුම සඳහා අත්සන් තැබීමෙන් වැළකී සිටි එම ජ්‍යෙෂ්ඨ නිලධාරීන් දෙදෙනාට අනිවාර්ය නිවාඩු ලබා දී සේවයෙන් බැහැර කර ඇති බව ඔහු සඳහන් කළේ ය.

එසේ කිරීමෙන් පෙනී යන්නේ, “නීතියට වැඩ කිරීම දඬුවම් ලැබිය හැකි වරදක් බවට පත්ව ඇති බව” යැයි ඔහු සඳහන් කළේ ය.

ඔහු ප්‍රකාශ කළේ, මේ වන විට “නීතියේ ආධිපත්‍යයට එරෙහිව කැලෑ නීතිය ක්‍රියාත්මක වෙමින් පවතින බව” ය.

කෙටි කාලයකට සේවයට පැමිණි සභාපතිවරයාගෙන් මෙම ගැටලුවට විසඳුම් නොලැබෙන බව අවබෝධ වූ බව ද ඔහු පැවසීය.

පවතින ගැටලුවලට විසඳුම් විදුලිබල අමාත්‍යංශය මට්ටමින් අපේක්ෂා කළ ද එය නොලැබුණු බැවින් මින් ඉදිරියට ජනාධිපතිවරයාට මැදිහත්ව මෙම ගැටලුවලට විසඳුම් ලබා දෙන ලෙස දන්වන බව ද ඔහු සඳහන් කළේ ය.

එමෙන් ම, යුගදනවි ගිවිසුම ඇතුළු මෙතෙක් මතුව ඇති ගැටලු සම්බන්ධයෙන් ශ්‍රේෂ්ඨාධිකරණයෙන් විසඳුම් ලබා ගැනීමට යොමු වුව ත් එයින් විසදුම් ලැබීමට පෙර වෘත්තීය සමිති අරගලවල නිරත වන්නට සිදු වනු ඇතැයි ද ඔහු වැඩිදුරට ත් අවධාරණය කළේ ය.

https://mawbima.lk/news-more/89854

loading comments...